Federata e Para Boccia e Kosovës mbajti seminarin për parandalimin e dukurive negative në sport

Në aktivitet morën pjesë 15 pjesëmarrës, përfshirë parasportistë, trajnerë, referë, asistentë sportivë dhe përfaqësues të Federatës.

Ligjërues i seminarit ishte Erëmal Gashi, i cili trajtoi rëndësinë e integritetit dhe etikës në sport, parimet e lojës së ndershme dhe përgjegjësinë e secilit për ruajtjen e një mjedisi të sigurt sportiv\.

Vëmendje e veçantë iu kushtua parandalimit të dhunës verbale dhe fizike, diskriminimit, ngacmimit dhe bullizmit. Gjithashtu, u trajtuan sjellja profesionale e sportistëve dhe stafit, parandalimi i manipulimit të rezultateve dhe konfliktet e interesit.

Seminari synoi të rrisë njohuritë e pjesëmarrësve për identifikimin, parandalimin dhe raportimin e sjelljeve të papranueshme, duke promovuar respektin reciprok dhe përgjegjësinë personale e institucionale.

Përmes këtij aktiviteti, Federata e Para Boccia e Kosovës promovoi një kulturë sportive gjithëpërfshirëse, ku dinjiteti, siguria dhe loja e ndershme janë në qendër të çdo aktiviteti.